संविधानाची प्रस्तावना वाचून विवाह

उस्मानाबाद येथे भारतीय संविधानाची प्रस्तावना वाचून करून नव वधू-वराने संसाराला सुरुवात केली. रविवारी भारतीय संविधान दिन, यानिमित्ताने उस्मानाबाद येथील जानराव व मडीखांबे कुटुंबाचा विवाह समारंभ होता. या विवाह सोहळ्यात नव वधू-वराने भारतीय संविधानाचे प्रास्ताविक उपस्थित वऱ्हाडी मंडळीकडून वाचून घेतले आणि एकमेकांच्या गळ्यात पुष्पहार घालून नवसंसारात पदार्पण केले. यावेळी संविधान फौंडेशनच्या वतीने आणि परिवर्तन सांस्कृतिक सामाजिक युवक मंडळाच्यावतीने भारतीय संविधानाचे पुस्तक या नव वधू-वराला भेट देण्यात आले.

उस्मानाबाद शहरातील अजिंठा नगर भागात राहणाऱ्या रामचंद्र बाबाराव जानराव यांची कन्या मेघाचा विवाह सोलापूरच्या श्रीकांत देविदास मडीखांबे यांच्या शुभम या मुलाशी ठरला होता. या दोघांच्या विवाहाची तारीख २६ नोव्हेंबर ठरली. या तारखेला १९४९ ला आपण आपल्या देशाच संविधान स्वीकारलं होतं. त्यामुळे याच औचित्य साधून जानराव आणि मडीखांबे कुटुंबांनी मेघा आणि शुभम यांचा विवाह २६ नोव्हेंबर यादिवशी भारतीय संविधानाच्या प्रास्ताविकाचे सामूहिक वाचन करून लावून दिला. या संविधानाने आपल्याला दिलेली मोठी देणे काय असेल तर एकमेकांच्या भावनाचा आदर करणे तोच आदर या नव वधू-वरांनी एकमेकाबद्दल ठेवावा म्हणून यादिवशी हा विवाह करत असल्याचे मेघाचे चुलते सतीश जानराव यांनी सांगितले.

स्वातंत्र्य, समता, न्याय, बंधुता, व्यक्तीस्वातंत्र्य आणि अभिव्यक्तीस्वातंत्र्य या तत्वांचा या दिवशी स्वीकार केला आहे. जो पर्यंत ही तत्व आहेत तो पर्यंत माझा देश, माझे संविधान, माझा अभिमान, मी प्रथम आणि अंतिमतः भारतीय आहे ही भावना प्रत्येक भारतीयांच्या मनात राहणार आहे. संविधान हे केवळ सत्तेचे कायदे ग्रंथित केलेले पुस्तक नाही. त्यातून राष्ट्रीय क्रांतीप्रमाणेच सामाजिक क्रांतीही अपेक्षित आहे. त्यामुळे स्वातंत्र्यदिन गणतंत्रदिना प्रमाणेच संविधान दिन साजरा झाला पाहिजे, अशी भावना वऱ्हाडी मंडळींनी यावेळी व्यक्त केली.

News: https://maharashtratimes.indiatimes.com/maharashtra/aurangabad-marathwada-news/aurangabad/unique-wedding-in-osmanbad/articleshow/61810845.cms

Be the first to comment

Leave a Reply

Your email address will not be published.


*